راكوبة حلمنتيش .. استريح معانا...

بسم الله .. فتحت الباب
وجمب الباب وقفت شوية في الشارع
وباب جيرانا كان مفتوح وظاهر انو زول طالع
وخلف الباب لمحت التوب
بلعت الريق .. لأني كتير بعرف التوب
وجوة التوب لقيت الزول
وظاهر انو دة المحبوب
معاه الجردل المليان
أكيد الموية مقطوعة
***
حرام والله ألف حرام
حرام الزول يشيل جردل
ويقطع ميل عشان حمام
حرام والله الف حرام
****
عليكم الله شوفوها
وعشان عينيها ساعدوها
وعشان محبوبتي مابتقدر
تشي الموية في جردل
*****
عليكم الله شوفوها
مبهدلة كيف مع الجردل
تشيل حبة وتخت نفسا
وتخت حبة وتشيل نفسا
وتخاف من توبا يتبلبل
وتاخد لفة الشارع
وكل الشافا يتبهدل
عليكم الله شوفوها
معذبة كيف مع الجردل
****
حرام ياموية الف حرام
**
كرهت الموية من البلف حتي الدش
ومن بابور مياه الحلة
حتي الهيئة
والماسورة
والناقورة
والصهريج
وموية النيل
وموية الزير
وخرطوش كابي في برميل
وحتي الغيمة لما تشيل
****
عليكم الله شوفوها
معذبة كيف مع الجردل
**
تشيل حبة وتخت نفسا
وتخت حبة وتشيل نفسا
وبلدنا النايمة ليها سنين
تشبع فينا من بالمغصة
وعيون نيلنا النبع من فوق
بتتفرج علي المغصة
وغيوم بلدي المشت من فوق
بتنزل وين ؟؟؟
بتنزل في كروش نجسا
ومطر بلدي النزل من فوق
بينزل وين ؟؟
بينزل فوق جناين سيدي يسقيها
وبينزل فوق عصافير الهوي السكنت
جناين سيدي يرويها
ومطر بلدي النزل من فوق
حينزل يوم ...
ونيل بلدي المرق من ضو
حيمرح يوم
وغيم بلدي الشرد ياناس
حيرجع يوم
وبت بلدي البكت في يوم
وضاقت وجعة الجردل
حتملأ الدنيا بالزغرود
وتنسي حكاية الجردل
الكشه في جده
من بورسودان
قطع التذاكر للسفر
الود خلاص قال اغترب
كبّا الهموم فى راسو كبْ
هم للعرس
هم للقرش
هم للملابس والدهبْ
( بتَّ الحلال) قالتلو يا زولي الحبيب
والحاجة قالت ( يا مجيب)
نجّيهو لىْ من كلو (جيب)
والود كمان شال الدُعا
يا ربى يّسر لى سبب
***
قطع البحر
لا فى الهبايب والخطرْ
لمّن وصل ( جّدة) بسلامْ
وقتو الوصل . من تاني قام شال الدُعا
يا كاشف الشر والكُرَبْ
نجيّني من (جِيب ) العرب
(جيب) النصايب والتّعب
و (الكشّه) والحظ الكَعَبْ
والناس تهاتي (الكشّه) جات
(الكشّه) راحت بى هناك
(الجيب) ظهر فوق الدَّرِبْ
الزول خلاص قلبو اضطرب
عقلو انشطب
فكر وحاول فى مفرْ
(لوحات حُمُر) فى السّكه
زى لمبات خطر
داقش يمين داقس شمال
لمّن وقع فوق المطب فى (باخشب)
قام خابى خب
خاف السؤال
(وين الهوّيه) سؤال صعب
يرميكا فى ساعة غضب
من جدّه لمن (ديم عرب)
***
كابوس لعين
زى الكمين
سمّوه كشه فى كل حينْ
منَّ الصباح لما المسا
جيبات كتيره مكدّسه
ناساً تقول صابينا صب
***
صاحبنا قال عامل (مقيم)
زرّوه فى حى (النعيم)
شالوه فى الجيب واعترف
ساقوه لى سجن القرف
والود هناك ضاق الشّقا
وضاق العذاب لمن فتر
قال ما خلاص ما فيش مفر
الجانى فى اللوح إنكتب
أحسن اكابس فى البلد
أزرع أرض
أصبر وأكل فى القرض
أنا أصلى قُبّال انقبض
فى جدّه ما خليت محل
أسأل أفتش فى عمل
والزول هناك مهما اشتغل
لا بدّ فى الجيب ينكمش
والناس هناك مغشوشة غش
(بالكبسه) بس تعمل كرش
**
أهلى الغُبش
أحسن لى من جمع القرش
أنا ما هنالك شفتا العجب
أنا تاني مِنّأ التوبه تب
لا كشه لا جيب لا تعب
لا جّده لا جيب لا عرب

****
عليكم الله شوفوها
معذبة كيف مع الجردل
**
احلى تحايا لاحلى موووون في الدنيا

لكن سؤالي من وين بتجيب الإبداعت دي

احلى تحية للمشاعر الجميلة
تسلم يموووون مان

يا سلام كلام كتير بس ما فاضي

يديكم العافيه يا شبيبه على تكرمكم بالمروووووور

شغل عجيب...

يا زول انت ورينا البت العاملة فيك كل دا منو؟؟؟
ولا نمشي لأبو الروم.... -أب سعد -
لكن يديك العافية...

منتظريين المزيد من ابداعاتك يا موووووووووون

يا سلاااااااااااام مشرفنا العزيز حتا وانتا بعيد معانا يديك العافيه لكن والله الله يعينا الفندق وقع فوق تحت